బిహార్‌లోని పశ్చిమ చంపారణ్ జిల్లా బగహాలో గత ఆరు నెలలుగా మేకలు, కోళ్లు మాయమవుతుండటంతో గ్రామస్తులు తీవ్ర ఆందోళన చెందారు. అయితే ఆ మిస్టరీ వెనుక ఉన్న అసలు కారణం తెలిశాక ఒక్కసారిగా అందరూ ఉలిక్కిపడ్డారు. ఒక ఇంటి వెనుక భాగంలో దాదాపు 20 అడుగుల పొడవైన భారీ కొండచిలువ తిష్ట వేసి ఉన్నట్లు గుర్తించారు. ఇన్నాళ్లుగా గుట్టుచప్పుడు కాకుండా జనావాసాల్లోనే నివసిస్తూ, పెంపుడు జంతువులను ఆహారంగా తీసుకుంటున్న ఈ మృగాన్ని చూసి స్థానికులు భయాందోళనకు గురయ్యారు.

వార్డు నెంబర్ 28లోని సంజయ్ కుమార్ అనే వ్యక్తి ఇంటి వెనుక ఈ భారీ సర్పం పట్టుబడింది. వరద నీటిలో కొట్టుకువచ్చిన ఈ కొండచిలువ, ఆ ప్రాంతంలోనే తన నివాసాన్ని ఏర్పాటు చేసుకుందని అటవీ శాఖ అధికారులు ధృవీకరించారు. స్థానికులు ఎంతో సాహసంతో ఆ కొండచిలువను బంధించి అటవీ శాఖకు అప్పగించారు. ఎటువంటి ప్రాణనష్టం జరగకపోవడంతో ఊపిరి పీల్చుకున్నప్పటికీ, అంత పెద్ద పాము జనావాసాల్లో ఉండటం వల్ల ఆ ప్రాంత ప్రజలు ఇంకా భయం భయంగానే గడుపుతున్నారు.