రాయ్‌పూర్‌లో నిర్వహించిన భిక్షాటన పునరావాస కార్యక్రమంలో అధికారులకు షాకింగ్ విషయాలు వెలుగులోకి వచ్చాయి. రోడ్డుపై భిక్షాటన చేస్తున్న ఒక మహిళ అసలు నేపథ్యం తెలిశాక అందరూ ఆశ్చర్యపోయారు. ఆమెకు సొంత ఇల్లు ఉండటమే కాకుండా, అందులో ఒక కొడుకు పెద్ద కిరాణా వ్యాపారం నిర్వహిస్తున్నాడు. మరొక కొడుకు విదేశాల్లో స్థిరపడి ఉద్యోగం చేస్తున్నాడు. ఆ మహిళకు తన ఇంటిపై నెలకు ఎనిమిది వేల రూపాయల అద్దె కూడా వస్తోంది. అంతేకాకుండా ఆమె బ్యాంకు ఖాతాలో వేల రూపాయల నగదు నిల్వ ఉన్నట్లు అధికారులు గుర్తించారు.

ఇంత ఆస్తిపాస్తులు ఉండి కూడా ఎందుకు భిక్షాటన చేస్తున్నారని ప్రశ్నించగా, తనకు అనారోగ్యం ఉందని అందుకే గుడులు, మసీదుల చుట్టూ తిరుగుతానని ఆమె సమాధానం ఇచ్చింది. నగరంలో భిక్షాటన చేస్తున్న వారు రోజుకు వేల రూపాయలు సంపాదిస్తూ ముఠాలుగా ఏర్పడ్డారని అధికారులు భావిస్తున్నారు. పునరావాస కేంద్రాల నుండి తప్పించుకోవడానికి వీరు రకరకాల కారణాలు చెబుతారని విచారణలో తేలింది. ప్రస్తుతం ఆ మహిళను పునరావాస కేంద్రానికి తరలించిన అధికారులు, ఆమెకు కౌన్సెలింగ్ ఇస్తూ భిక్షాటన వెనుక ఉన్న అసలు కారణాలను ఆరా తీస్తున్నారు.