పాకిస్థాన్ రాజధాని ఇస్లామాబాద్‌లోని షెహజాద్ టౌన్ పరిధిలో ఉన్న తర్లాయ్ ఇమాంబర్గా మసీదు వద్ద జరిగిన భీకర ఆత్మాహుతి దాడిలో 15 మంది ప్రాణాలు కోల్పోయారు. సాయంత్రం ప్రార్థనల సమయంలో ఒక ఉగ్రవాది పేలుడు పదార్థాలతో మసీదులోకి ప్రవేశించడానికి ప్రయత్నించాడు. అయితే, భద్రతా సిబ్బంది అతడిని ప్రధాన గేటు వద్దే అడ్డుకోవడంతో అక్కడే తనను తాను పేల్చుకున్నాడు.

ఈ ఘటనలో సుమారు 80 మంది తీవ్రంగా గాయపడ్డారు. పేలుడు ధాటికి మసీదు గేట్లు, సమీప భవనాల కిటికీలు ధ్వంసమయ్యాయి. మృతుల సంఖ్య ఇంకా పెరిగే అవకాశం ఉందని అధికారులు భావిస్తున్నారు. ఘటనా స్థలంలో శరీర భాగాలు చెల్లాచెదురుగా పడి ఉండటం అక్కడి భయానక పరిస్థితిని ప్రతిబింబిస్తోంది. ప్రస్తుతం భద్రతా దళాలు ఆ ప్రాంతాన్ని తమ ఆధీనంలోకి తీసుకున్నాయి.