భారత సైన్యం సరికొత్త చరిత్ర సృష్టించేందుకు సిద్ధమైంది. ప్రపంచంలోనే మొట్టమొదటిసారిగా 155 మిమీ ఆర్టిలరీ షెల్స్‌లో రామ్‌జెట్ సాంకేతికతను ప్రవేశపెడుతోంది. ఐఐటి మద్రాస్ సహకారంతో స్వదేశీ పరిజ్ఞానంతో తయారైన ఈ టెక్నాలజీ ద్వారా ఫిరంగుల మారణాయుధ శక్తి ఏమాత్రం తగ్గకుండా, వాటి పరిధిని 30 నుండి 50 శాతం వరకు పెంచుకోవచ్చు. సైన్యంలో ఇప్పటికే ఉన్న ధనుష్, ఎం-777 వంటి 155 మిమీ ఫిరంగులన్నింటికీ ఈ కొత్త గుండ్లను వినియోగించుకోవచ్చని ఆర్మీ వర్గాలు తెలిపాయి.

రక్షణ రంగంలో ‘ఆత్మనిర్భర్ భారత్’ లక్ష్యానికి ఇది ఒక కీలక మైలురాయి. 2013లో వెల్లడైన మందుగుండు సామాగ్రి కొరతను అధిగమించి, ఇప్పుడు సుదీర్ఘ పోరాటాలకు భారత్ సన్నద్ధమవుతోంది. సాధారణంగా క్షిపణులలో వాడే రామ్‌జెట్ ఇంజిన్లను ఇప్పుడు ఫిరంగి గుండ్లలో వాడటం ద్వారా, శత్రువులకు అందనంత దూరం నుంచి అత్యంత కచ్చితత్వంతో దాడి చేసే సామర్థ్యం భారత సైన్యానికి సొంతం కానుంది.