దక్షిణాఫ్రికా టీ20 లీగ్ చరిత్రలో తొలిసారిగా ఒక మ్యాచ్ ఫలితం సూపర్ ఓవర్ ద్వారా తేలింది. జోహన్నెస్‌బర్గ్‌లో జోబర్గ్ సూపర్ కింగ్స్ మరియు డర్బన్ సూపర్ జెయింట్స్ మధ్య జరిగిన ఈ ఉత్కంఠభరిత పోరులో జోబర్గ్ విజయం సాధించింది. మొదట బ్యాటింగ్ చేసిన జోబర్గ్ 205 రన్నులు చేయగా, డర్బన్ కూడా నిర్ణీత ఓవర్లలో సరిగ్గా 205 రన్నులే చేయడంతో మ్యాచ్ టై అయింది. దీంతో లీగ్ నాలుగో సీజన్‌లో మొదటిసారి సూపర్ ఓవర్ అనివార్యమైంది.

ఐపీఎల్ వేలంలో అమ్ముడుపోని ఇంగ్లాండ్ పేసర్ రిచర్డ్ గ్లీసన్ ఈ విజయంలో కీలక పాత్ర పోషించారు. సూపర్ ఓవర్ వేసిన గ్లీసన్ కేవలం 5 పరుగులు మాత్రమే ఇచ్చి ఒక వికెట్ పడగొట్టారు. అనంతరం 6 పరుగుల స్వల్ప లక్ష్యాన్ని జోబర్గ్ బ్యాటర్ డోనోవన్ ఫెరీరా కేవలం మూడు బంతుల్లోనే ఛేదించి జట్టుకు చారిత్రాత్మక విజయాన్ని అందించారు. ప్రధాన మ్యాచ్‌లోనూ మూడు వికెట్లు తీసిన గ్లీసన్, తన అద్భుత బౌలింగ్‌తో అందరి దృష్టిని ఆకర్షించారు.