ఎన్టీఆర్ జిల్లాలో దోమల కాయిల్ వల్ల జరిగిన అగ్ని ప్రమాదంలో తొమ్మిదేళ్ల బాలుడు మృతి చెందిన హృదయవిదారక ఘటన వెలుగుచూసింది. అనిల్ కుమార్ అనే వ్యక్తి తన కుటుంబంతో కలిసి నిద్రిస్తున్న సమయంలో దోమల బెడద నుంచి తప్పించుకోవడానికి కాయిల్ వెలిగించారు. గాఢనిద్రలో ఉండగా బాలుడి దుప్పటి కాయిల్ పై పడటంతో ఒక్కసారిగా మంటలు చెలరేగి బాలుడు తీవ్రంగా గాయపడ్డాడు. వెంటనే ఆసుపత్రికి తరలించినప్పటికీ చికిత్స పొందుతూ మరణించాడు.

ఇళ్లలో దోమల కాయిల్స్ వాడేటప్పుడు అజాగ్రత్తగా ఉండటం ప్రాణాంతకమని నిపుణులు హెచ్చరిస్తున్నారు. కిటికీలు, తలుపులు మూసి కాయిల్ వెలిగించడం వల్ల వెలువడే విషపూరిత పొగ ఊపిరి ఆడకుండా చేసి మరణానికి దారితీయవచ్చు. ఇటువంటి ప్రమాదాలను నివారించడానికి నిద్రపోయే ముందు కాయిల్ ఆపివేయడం లేదా పడకకు దూరంగా ఉంచడం శ్రేయస్కరమని వారు సూచిస్తున్నారు. ఈ విషాదంతో ఆ కుటుంబంలో తీవ్ర విషాదం నెలకొంది.