దక్షిణ మెక్సికోలో పసిఫిక్ మహాసముద్రాన్ని మెక్సికో గల్ఫ్‌తో అనుసంధానించే ఇంటర్ ఓషియానిక్ రైలు పట్టాలు తప్పడంతో భారీ ప్రమాదం సంభవించింది. ఈ దుర్ఘటనలో 13 మంది ప్రాణాలు కోల్పోగా సుమారు 98 మంది ప్రయాణికులు తీవ్రంగా గాయపడ్డారు. ఓక్సాకా మరియు వెరాక్రూజ్ సరిహద్దులోని నిజాండా పట్టణం సమీపంలో మలుపు వద్ద రైలు వేగంగా వెళ్తుండగా ఈ ప్రమాదం జరిగినట్లు తెలుస్తోంది.

ప్రమాద సమయంలో రైలులో 241 మంది ప్రయాణికులు మరియు తొమ్మిది మంది సిబ్బంది ఉన్నారు. సమాచారం అందుకున్న వెంటనే సహాయక బృందాలు రంగంలోకి దిగి క్షతగాత్రులను ఆసుపత్రికి తరలించాయి. 2023లో ప్రారంభమైన ఈ ప్రతిష్టాత్మక రైలు మార్గంలో ప్రస్తుతం రాకపోకలు నిలిచిపోయాయి. ప్రభుత్వం ఈ ఘటనపై ఉన్నత స్థాయి విచారణకు ఆదేశించిందని అధికారులు వెల్లడించారు.