అండర్-19 ఆసియా కప్ ఫైనల్ ముగిసిన అనంతరం నాటకీయ పరిణామాలు చోటుచేసుకున్నాయి. ఏసీసీ ప్రెసిడెంట్, పీసీబీ ఛైర్మన్ మొహ్సిన్ నఖ్వీని భారత క్రికెటర్లు బహిరంగంగానే విస్మరించారు. నఖ్వీ చేతుల మీదుగా పతకాలు తీసుకోవడానికి నిరాకరించిన వైభవ్ బృందం, వేదికను పంచుకోబోమని స్పష్టం చేశారు. చివరకు వేరే అధికారి నుంచి పతకాలు స్వీకరించి తమ నిరసనను వ్యక్తం చేశారు.

ఈ మ్యాచ్‌లో పాకిస్థాన్ 347 పరుగులు చేయగా, భారత్ 156 పరుగులకే కుప్పకూలింది. ఓటమి తర్వాత జరిగిన ప్రైజ్ డిస్ట్రిబ్యూషన్ సమయంలో భారతీయుల ప్రవర్తన చర్చనీయాంశమైంది. గతంలో సీనియర్ జట్టు కూడా ఇలాగే నఖ్వీని దూరం పెట్టిన సంగతి తెలిసిందే. జాతీయ గౌరవమే ముఖ్యం అని చాటిచెప్పేలా భారత యువ ఆటగాళ్లు తీసుకున్న ఈ నిర్ణయం సోషల్ మీడియాలో వైరల్‌గా మారింది.