ఉత్తరప్రదేశ్‌లోని ఘాజీపూర్‌లో ఆస్తి వివాదం కారణంగా లల్లన్ యాదవ్ దారుణంగా హత్యకు గురయ్యారు. ఘాజీపూర్‌కు చెందిన లల్లన్ కోల్‌కతాలో నివసిస్తున్నప్పటికీ, గ్రామంలోని తమ భూమి విషయంలో సోదరుడు హీరాతో చాలా కాలంగా వివాదం నడుస్తోంది. తక్కువ ధరకు భూమిని కొనుగోలు చేయాలని హీరా కోరుకోవడమే ఈ వివాదానికి కారణం. ఈ క్రమంలోనే కిరాయి హంతకులను పెట్టి లల్లన్‌ను హత్య చేయాలని హీరా కుట్ర పన్నినట్లు విచారణలో తేలింది.

డిసెంబర్ 2న ఘాజీపూర్ నుండి లల్లన్ అదృశ్యమయ్యారు. దీనిపై పోలీసులకు ఫిర్యాదు అందింది. డిసెంబర్ 4న నంద్‌గంజ్ తర్నా వంతెన సమీపంలో ఒక సిమెంట్ పైపు లోపల లల్లన్ ఛిద్రమైన మృతదేహం లభ్యమైంది. అతన్ని ఇనుప రాడ్, పారతో కొట్టి చంపినట్లు, హత్య తర్వాత మృతదేహాన్ని పైపులో నింపి దాచినట్లు పోలీసులు తెలిపారు. ఈ కేసులో, ప్రధాన నిందితుడు సోదరుడు హీరా యాదవ్, అతని కుమారుడు అంకిత్ యాదవ్ సహా మొత్తం ఐదుగురిని పోలీసులు అరెస్టు చేశారు. హత్యకు ఉపయోగించిన ఆయుధాలను కూడా స్వాధీనం చేసుకున్నారు.