హల్ద్వానీలోని బన్‌భూల్‌పురాలో రైల్వే భూమి ఆక్రమణల తొలగింపుపై స్టే ఇచ్చేందుకు సుప్రీంకోర్టు నిరాకరించింది. రైల్వే విస్తరణ దృష్ట్యా ఆ భూమిని ఖాళీ చేయాల్సిందేనని, నివాసితులకు అదే స్థలంలో పునరావాసం పొందే హక్కు లేదని కోర్టు స్పష్టం చేసింది. అయితే, వేలాది కుటుంబాలు నిరాశ్రయులయ్యే అవకాశం ఉన్నందున, మానవీయ కోణంలో వారికి సహాయం చేయాలని అధికారులను ఆదేశించింది.

బాధిత కుటుంబాలకు ప్రధాన మంత్రి ఆవాస్ యోజన కింద ఇళ్లు పొందేందుకు అర్హత ఉందో లేదో పరిశీలించాలని కోర్టు సూచించింది. మార్చి 18 నుండి ప్రత్యేక క్యాంపులు ఏర్పాటు చేసి, అర్హులైన వారిని గుర్తించాలని అధికారులను ఆదేశించింది. మార్చి 31 నాటికి దీనిపై సమగ్ర నివేదిక సమర్పించాలని, పునరావాస ప్రక్రియలో జిల్లా యంత్రాంగం చురుగ్గా వ్యవహరించాలని ధర్మాసనం పేర్కొంది.