రక్తంలో చెడు కొలెస్ట్రాల్ లేదా ఎల్‌డీఎల్ స్థాయిలు పెరిగినప్పుడు రక్త ప్రసరణ సాంద్రత పెరిగి రక్తనాళాల్లో అడ్డంకులు ఏర్పడతాయి. దీనివల్ల చేతులు, కాళ్లు మరియు పాదాల్లో సూదితో గుచ్చినట్లు లేదా స్వల్పంగా నొప్పి అనిపించవచ్చు. ముఖ్యంగా రక్త ప్రసరణ మందగించడం వల్ల భుజం, మెడ వెనుక భాగం మరియు దవడ ప్రాంతాల్లో నొప్పులు వచ్చే అవకాశం ఉంది. వీటికంటే ప్రమాదకరమైనది ఛాతీ నొప్పి లేదా ఆంజినా, ఇది గుండెకు వెళ్లే రక్తప్రసరణలో ఆటంకాన్ని సూచిస్తుంది కాబట్టి అశ్రద్ధ చేయకూడదు.

శరీర నొప్పులతో పాటు కళ్ల కింద తెల్లటి మచ్చలు ఏర్పడటం, విపరీతమైన అలసట, అకస్మాత్తుగా బరువు పెరగడం మరియు మానసిక ఒత్తిడి వంటివి అధిక కొలెస్ట్రాల్‌కి ప్రధాన లక్షణాలు. కేవలం సాధారణ పరీక్షలకే పరిమితం కాకుండా, కనీసం 8 నుండి 10 గంటల పాటు ఖాళీ కడుపుతో ఉండి ‘లిపిడ్ ప్రొఫైల్’ పరీక్ష చేయించుకోవడం ఉత్తమం. నివేదికల ఆధారంగా వెంటనే వైద్యుడిని సంప్రదించి సరైన చికిత్స మరియు ఆహార నియమాలు పాటించడం ద్వారా గుండె సంబంధిత ప్రమాదాల నుండి రక్షణ పొందవచ్చు.