ముంబై: వేల కోట్ల రూపాయల బ్యాంకు రుణాల ఎగవేత కేసులో నిందితుడు, పరారీలో ఉన్న మద్యం వ్యాపారి విజయ్ మాల్యా మరోసారి వార్తల్లో నిలిచారు. తాను ఎప్పుడు భారత్‌కు వస్తానో కచ్చితంగా చెప్పలేనంటూ బాంబే హైకోర్టుకు తేల్చి చెప్పారు.

బుధవారం తన న్యాయవాది అమిత్ దేశాయ్ ద్వారా కోర్టుకు సమర్పించిన వాంగ్మూలంలో మాల్యా కీలక విషయాలను వెల్లడించారు. భారత ప్రభుత్వం 2016లోనే తన పాస్‌పోర్ట్‌ను రద్దు చేసిందని, ప్రస్తుతం తన వద్ద ఎటువంటి యాక్టివ్ పాస్‌పోర్ట్ లేదని ఆయన పేర్కొన్నారు. బ్రిటన్ (UK) చట్టాల ప్రకారం ఆ దేశం విడిచి వెళ్లడానికి తనకు అనుమతి లేదని, కనీసం అంతర్జాతీయ ప్రయాణ పత్రాల కోసం దరఖాస్తు చేసుకునే హక్కు కూడా తనకు లేదని వివరించారు. ఈ కారణాల వల్ల తాను భారత్‌కు వచ్చే తేదీని ఖరారు చేయలేకపోతున్నానని కోర్టుకు విన్నవించారు.

అయితే, గత వారం ఈ కేసును విచారించిన చీఫ్ జస్టిస్ చంద్రశేఖర్ ధర్మాసనం మాల్యా తీరుపై తీవ్రంగా స్పందించింది. మాల్యా అసలు దేశానికి తిరిగి రావాలని అనుకుంటున్నారో లేదో స్పష్టం చేయాలని ఆదేశించింది. ఆయన ఇండియాకు తిరిగి వచ్చే వరకు ఆయన దాఖలు చేసిన పిటిషన్లపై విచారణ జరిపే ప్రసక్తే లేదని కోర్టు స్పష్టం చేసింది. ప్రభుత్వ చర్యల వల్లే తాను రాలేకపోతున్నానని మాల్యా సాకులు చెబుతుండటంతో ఈ కేసు ఇప్పుడు మరింత ఆసక్తికరంగా మారింది.