యెమన్‌లోని ముకల్లా పోర్ట్ సిటీపై సౌదీ అరేబియా జరిపిన తాజా వైమానిక దాడులు మిడిల్ ఈస్ట్ రాజకీయాల్లో వేడిని పెంచాయి. యూఏఈ మద్దతుతో పనిచేస్తున్న సదరన్ ట్రాన్సిషనల్ కౌన్సిల్ లేదా ఎస్టీసీ అనే వేర్పాటువాద సంస్థకు ఆయుధాలు అందుతున్నాయనే నెపంతో సౌదీ ఈ దాడికి దిగింది. 2017లో స్థాపించబడిన ఎస్టీసీ యెమన్‌ను రెండుగా విభజించి ప్రత్యేక దక్షిణ దేశాన్ని ఏర్పాటు చేయాలని కోరుతోంది. చమురు మరియు సహజ వనరులు పుష్కలంగా ఉన్న ప్రాంతాలపై పట్టు సాధించడమే ఈ సంస్థ ప్రధాన లక్ష్యం.

యెమన్ ప్రాంతీయ సమగ్రతను కోరుకునే సౌదీ అరేబియా ఆ దేశ విభజనను తీవ్రంగా వ్యతిరేకిస్తోంది. అయితే ఎర్ర సముద్రం మరియు అరేబియా సముద్ర మార్గాలపై ఆధిపత్యం కోసం యూఏఈ ఈ సంస్థను ప్రోత్సహిస్తోందని సౌదీ ఆరోపిస్తోంది. ప్రపంచ చమురు వాణిజ్యంలో 12 శాతం ఈ మార్గం గుండానే సాగుతుండటంతో ఈ ప్రాంతం వ్యూహాత్మకంగా కీలకంగా మారింది. ఎస్టీసీ ఎదుగుదలను అడ్డుకోవడానికి సౌదీ చేస్తున్న ప్రయత్నాలు ఇటు యూఏఈతో మరియు అటు ఇరాన్ మద్దతు ఉన్న హూతీ తిరుగుబాటుదారులతో తీవ్ర ఘర్షణకు దారితీస్తున్నాయి.