లోక్‌సభలో ఎన్నికల సంస్కరణలపై చర్చ జరుగుతుండగా, కేంద్ర హోం మంత్రి అమిత్ షా కాంగ్రెస్ ఎంపీ రాహుల్ గాంధీపై తీవ్రంగా మండిపడ్డారు. నవంబర్ 5న జరిగిన ప్రెస్ కాన్ఫరెన్స్‌లో హర్యానాలో ఓటింగ్ ప్రక్రియలో అవకతవకలపై రాహుల్ ‘అబద్ధపు’ సమాచారం ఇచ్చారని, నిరాధారమైన ‘ఓట్ల దొంగతనం’ కథనాన్ని సృష్టించేందుకు ప్రయత్నించారని షా ఆరోపించారు.

దీనికి ప్రతిస్పందనగా, యూపీ మరియు హర్యానాలలో ఓట్ల దొంగతనం జరిగిందని వివరిస్తూ, రాహుల్ గాంధీ షాకు సవాల్ విసరడంతో పరిస్థితి వేడెక్కింది. దీనికి హోం మంత్రి బదులిస్తూ, “మీ ఆదేశంతో పార్లమెంట్ నడవదు. నేను ఏమి మాట్లాడాలి అనేది నేను నిర్ణయిస్తాను” అని అన్నారు. రాహుల్ తన సమాధానం కోసం ఓపికగా వేచి ఉండాలని షా సలహా ఇచ్చారు. అంతేకాకుండా, దేశ తొలి ప్రధాని జవహర్‌లాల్ నెహ్రూ కూడా ఓట్ల దొంగతనం ద్వారానే ఎన్నికయ్యారని షా వాదించారు.