భారతీయ వ్యక్తిని వివాహం చేసుకుని ఇక్కడే నివసిస్తున్న పాకిస్థాన్ జాతీయురాలు నిఘాత్ యాస్మిన్ పౌరసత్వ దరఖాస్తుపై కర్ణాటక హైకోర్టు కీలక ఆదేశాలు జారీ చేసింది. రెండు దేశాల మధ్య ఉద్రిక్తతల నేపథ్యంలో ఆమె పౌరసత్వ ప్రక్రియలో ఎదురవుతున్న అడ్డంకులను తొలగిస్తూ, కొత్తగా దరఖాస్తు చేసుకోవాలని కోర్టు సూచించింది. విదేశీ వ్యవహారాల మంత్రిత్వ శాఖ మరియు హోం శాఖలు ఆమె దరఖాస్తును చురుగ్గా పరిశీలించాలని, దీర్ఘకాలిక వీసా గడువు ముగిసేలోపే ఈ ప్రక్రియను పూర్తి చేయాలని జస్టిస్ సూరజ్ గోవిందరాజ్ స్పష్టం చేశారు.

కుటుంబ బంధాలను దృష్టిలో ఉంచుకుని, దరఖాస్తు పెండింగ్‌లో ఉన్న సమయంలో ఆమెను దేశం నుంచి బహిష్కరించకూడదని కోర్టు ఆదేశించింది. నిబంధనల ప్రకారం దరఖాస్తు చేసుకున్నప్పటికీ, పోర్టల్ లోని సాంకేతిక కారణాలు మరియు విసా విధానాల్లో మార్పుల వల్ల ఆమె ఇబ్బందులు ఎదుర్కొంటున్నారని న్యాయస్థానం గుర్తించింది. ఈ తీర్పుతో తన భర్త మరియు ఇద్దరు పిల్లలతో కలిసి భారత్‌లో ఉండాలనుకుంటున్న యాస్మిన్‌కు పెద్ద ఉపశమనం లభించింది.