రష్యా-ఉక్రెయిన్ యుద్ధం తర్వాత, రష్యా అధ్యక్షుడు వ్లాదిమిర్ పుతిన్ (Vladimir Putin) తొలిసారిగా భారతదేశానికి వస్తున్నారు. డిసెంబర్ 4-5 తేదీల్లో జరిగే 23వ ఇండో-రష్యా వార్షిక సమ్మిట్‌లో ఆయన ప్రధాని నరేంద్ర మోదీతో పాల్గొంటారు. ఈ సమావేశంలో, ఇరు దేశాల రక్షణ సహకారాన్ని బలోపేతం చేయడంపై ప్రధానంగా చర్చ జరగనుంది. ముఖ్యంగా, పాకిస్తాన్‌కు కలవరం పెంచుతున్న S-400 క్షిపణి రక్షణ వ్యవస్థలకు సంబంధించి కొత్త ఒప్పందం కుదిరే అవకాశం ఉంది.

భారత వైమానిక దళానికి మరో రెండు లేదా మూడు S-400 వ్యవస్థలను సరఫరా చేయాలనే ప్రతిపాదనను మాస్కో ఈ సమ్మిట్‌లో చేయవచ్చు. పుతిన్ పర్యటన ఢిల్లీ మరియు మాస్కో మధ్య స్నేహపూర్వక సంబంధాలను మరింత బలోపేతం చేస్తుంది. ఆత్మనిర్భర్ భారత్ కారణంగా ఆయుధాల దిగుమతిలో రష్యాపై భారతదేశం ఆధారపడటం తగ్గినప్పటికీ, S-400 వంటి వ్యూహాత్మక ఒప్పందాలు ద్వైపాక్షిక సంబంధాలకు ప్రాధాన్యతనిస్తాయి. ఉక్రెయిన్ సంక్షోభం గురించి కూడా చర్చలు జరగవచ్చు.