ఉద్యోగం మారిన లేదా మానేసిన పిఎఫ్ ఖాతాదారులు తమ పెన్షన్ ఫండ్ డబ్బును విత్‌డ్రా చేసుకునే విషయంలో ఈపీఎఫ్ఓ కీలక నిర్ణయం తీసుకుంది. ఇకపై పెన్షన్ నిధులను ఉపసంహరించుకోవాలంటే కనీసం మూడేళ్ల పాటు వేచి చూడాల్సి ఉంటుంది. మూడేళ్ల గడువు ముగిసిన తర్వాతే నిర్ణీత నిబంధనల ప్రకారం దరఖాస్తు చేసుకునే అవకాశం ఉంటుంది. ఉద్యోగుల పదవీ విరమణ అనంతర ఆర్థిక భద్రతను దృష్టిలో ఉంచుకుని అధికారులు ఈ మార్పులు చేస్తున్నారు.

చాలామంది ఉద్యోగులు తక్కువ కాలంలోనే పెన్షన్ డబ్బును వెనక్కి తీసుకోవడం వల్ల భవిష్యత్తులో పెన్షన్ ప్రయోజనాలు తగ్గుతున్నాయని అధికారులు గుర్తించారు. ఈ ధోరణిని అరికట్టి, పొదుపును ప్రోత్సహించేందుకే ఈ కనీస కాలపరిమితిని విధిస్తున్నారు. దీనివల్ల ఉద్యోగుల పెన్షన్ నిధి సురక్షితంగా ఉండటమే కాకుండా, పదవీ విరమణ సమయంలో వారికి మెరుగైన ఆర్థిక ప్రయోజనం చేకూరుతుందని ఈపీఎఫ్ఓ భావిస్తోంది.