సాధారణంగా పాలకూర అనగానే పప్పులో వేయడమో లేదా టమాటా కలిపి వండటమో చూస్తుంటాం. కానీ పాలకూరతో ఉల్లికారం కలిపి చేసే ఈ స్పెషల్ కర్రీ రుచి చూస్తే ఇక వదిలిపెట్టరు. ఆరోగ్యానికి ఆరోగ్యంతో పాటు జిహ్వచాపల్యాన్ని తీర్చే ఈ అద్భుతమైన వంటకాన్ని ఎలా తయారు చేయాలో ఇప్పుడు చూద్దాం.

కావాల్సిన పదార్థాలు

• పాలకూర కట్టలు – 3
• ఉల్లిపాయలు – 3 లేదా 4
• వెల్లుల్లి రెబ్బలు – 20
• నూనె – 4 టేబుల్ స్పూన్లు
• తాలింపు గింజలు – 1 టీస్పూన్
• ఎండుమిర్చి – 2
• కరివేపాకు – 2 రెమ్మలు
• ధనియాల పొడి – 1 టీస్పూన్
• జీలకర్ర పొడి – అర టీస్పూన్
• పసుపు, కారం, ఉప్పు – రుచికి సరిపడా

తయారీ విధానం

ముందుగా పాలకూరను శుభ్రంగా కడిగి చిన్న ముక్కలుగా కట్ చేసి పక్కన పెట్టుకోవాలి. ఉల్లిపాయలను కూడా ముక్కలుగా కోసుకోవాలి. ఇప్పుడు ఒక మిక్సీ జార్ తీసుకుని అందులో ఉల్లిపాయ ముక్కలు, వెల్లుల్లి రెబ్బలు, కారం మరియు ఉప్పు వేసి మరీ మెత్తగా కాకుండా కొంచెం బరకగా గ్రైండ్ చేసుకోవాలి. ఇదే అసలైన ‘ఉల్లికారం’.

ఇప్పుడు స్టవ్ మీద బాండీ పెట్టి నూనె వేయాలి. నూనె వేడెక్కాక తాలింపు గింజలు, ఎండుమిర్చి, కరివేపాకు వేసి వేయించాలి. తాలింపు వేగిన తర్వాత సిద్ధం చేసుకున్న ఉల్లికారం పేస్ట్ వేసి పచ్చి వాసన పోయే వరకు బాగా మగ్గించాలి.

ఉల్లిపాయ మిశ్రమం వేగిన తర్వాత అందులో కట్ చేసి పెట్టుకున్న పాలకూర వేసి బాగా కలపాలి. పాలకూరలోని నీరు పోయి నూనె పైకి తేలే వరకు మధ్యమధ్యలో కలుపుతూ ఉడికించాలి. చివరగా పసుపు, ధనియాల పొడి, జీలకర్ర పొడి వేసి మరో రెండు నిమిషాలు వేయించి స్టవ్ ఆఫ్ చేయాలి. అంతే.. ఘుమఘుమలాడే పాలకూర ఉల్లికారం సిద్ధం. ఇది వేడి వేడి అన్నంలోకి లేదా చపాతీలోకి అద్భుతంగా ఉంటుంది.