కర్ణాటకలోని ఉత్తర కన్నడ జిల్లా కార్వార్ తీర ప్రాంతంలో ఒక సీగల్ పక్షి శరీరానికి చైనా తయారీ జిపిఎస్ పరికరం అమర్చి ఉండటాన్ని స్థానికులు గుర్తించారు. అత్యంత వ్యూహాత్మకమైన ఐఎన్ఎస్ కదంబ నౌకాదళ స్థావరానికి సమీపంలో ఈ పక్షి కనిపించడంతో భారత భద్రతా సంస్థలు మరియు అటవీ శాఖ అప్రమత్తమయ్యాయి. ఇది ప్రాథమికంగా ‘చైనీస్ అకాడమీ ఆఫ్ సైన్సెస్’ పరిశోధన సంస్థకు చెందినదిగా భావిస్తున్నప్పటికీ, రక్షణ రంగపరంగా ఈ ప్రాంతానికి ఉన్న ప్రాధాన్యత దృష్ట్యా అధికారులు అన్ని కోణాల్లో దర్యాప్తు చేస్తున్నారు.

అరేబియా సముద్రంలో నిఘా మరియు సైనిక అవసరాల కోసం కార్వార్ బేస్ భారత్‌కు అత్యంత కీలకమైనది. గతంలో జరిగిన ఆపరేషన్ సిందూర్ సమయంలోనూ ఈ స్థావరం కీలక పాత్ర పోషించింది. గత ఏడాది కూడా ఇదే ప్రాంతంలో ఇలాంటి పరికరం ఉన్న డేగ కనిపించగా, అది చివరకు వైల్డ్ లైఫ్ రీసెర్చ్‌గా తేలింది. ప్రస్తుతం ఈ సీగల్ పక్షిని మెరైన్ ఫారెస్ట్ అధికారులు పర్యవేక్షిస్తున్నారు. చైనా పరిశోధనా సంస్థ నుండి స్పష్టమైన సమాచారం వచ్చే వరకు ఈ పక్షిని భద్రతా కారణాల దృష్ట్యా నిశితంగా పరిశీలిస్తామని అధికారులు వెల్లడించారు.