పార్లమెంట్ భవనంలో జరిగిన ఎన్‌డిఎ పార్లమెంటరీ పార్టీ సమావేశంలో ప్రధానమంత్రి నరేంద్ర మోడీ ‘సంస్కరణల’ (Reform) ఆవశ్యకతపై ఎంపీలకు దిశానిర్దేశం చేశారు. పౌరుల జీవితాలను సులభతరం చేయడమే లక్ష్యంగా ప్రభుత్వ నియమాలు ఉండాలని ఆయన స్పష్టం చేశారు. “నియమాలు, చట్టాలు మంచివే, కానీ అవి ప్రజల జీవితాలకు ఇబ్బంది కలిగించకుండా, వ్యవస్థను మెరుగుపరచడానికి ఉపయోగపడాలి. ప్రజల సౌలభ్యాన్ని నిర్ధారించడం మన బాధ్యత,” అని ప్రధాని ఉద్ఘాటించారు.

కేంద్ర మంత్రి కిరణ్ రిజిజు ప్రకారం, ఆర్థిక అంశాలతో పాటు ప్రతి రంగంలో సంస్కరణలు జరగాలని ప్రధాని మోడీ నొక్కి చెప్పారు. అనవసరమైన కాగితపు పనిని, పదేపదే డేటా సమర్పించే ప్రక్రియను తొలగించాలని, పౌరులకు ఇంటి వద్దకే సేవలు అందించాలని మోడీ ఎంపీలకు సూచించారు. ఎంపీలు తమ నియోజకవర్గాల్లో చురుకుగా పనిచేయాలని, యువతతో సంబంధాలు పెంచుకోవాలని కోరారు.