ఉత్తరప్రదేశ్‌లోని బరేలీలో కూతురి నికాహ్ విందుకు హిందువులను ఆహ్వానించడం తీవ్ర సంచలనం సృష్టించింది. మొహమ్మద్‌పూర్ జటాన్ గ్రామానికి చెందిన తాహిర్ అలీ, తన కూతురి నికాహ్‌కు ముందు డిసెంబర్ 1 న తన హిందూ స్నేహితుల కోసం శాఖాహార విందును ఏర్పాటు చేశారు. అయితే, కొంతమంది మౌల్వీలు, గ్రామస్తుల అభ్యంతరాల కారణంగా, డిసెంబర్ 2 న ముస్లింల కోసం ఏర్పాటు చేసిన ప్రధాన విందుకు చాలా మంది గ్రామస్తులు హాజరు కాలేదు. హిందువులకు ముందుగా విందు ఇవ్వడం వల్లే ఈ సామూహిక బహిష్కరణ జరిగిందని తాహిర్ అలీ ఆరోపించారు.

ఈ ఘటన కారణంగా సుమారు నాలుగు నుంచి ఐదు లక్షల రూపాయల వరకు నష్టం జరిగింది, మొత్తం కార్యక్రమం కళావిహీనమైంది. సామాజిక విమర్శలు, వేధింపులకు విసిగిపోయిన రైతు తాహిర్ అలీ, రెచ్చగొట్టిన వారిపై శనివారం భోజిపురా పోలీస్ స్టేషన్‌లో ఫిర్యాదు చేశారు. అయితే, ఆదివారం ఉదయం ఆయన స్వయంగా తన ఫిర్యాదును ఉపసంహరించుకున్నారు. ఇరుపక్షాల మధ్య చర్చలు జరిగి మనస్పర్థలు తొలగిపోయాయని, అందుకే తదుపరి ఎలాంటి న్యాయపరమైన చర్యలు తీసుకోవడానికి ఇష్టపడడం లేదని ఆయన తెలిపారు.