దేశ రక్షణలో కీలకమైన సిలిగురి కారిడార్ లేదా ‘చికెన్స్ నెక్’ ప్రాంతం వద్ద భారతీయ రైల్వే ఒక చారిత్రాత్మక నిర్ణయం తీసుకుంది. రైల్వే మంత్రి అశ్విని వైష్ణవ్ పర్యవేక్షణలో వ్యూహాత్మక భద్రతను పటిష్టం చేసేందుకు ఇక్కడ అత్యాధునిక భూగర్భ రైలు మార్గాన్ని నిర్మించనున్నారు. సుమారు 35.76 కిలోమీటర్ల పొడవైన ఈ సొరంగ మార్గం యుద్ధం లేదా అత్యవసర పరిస్థితుల్లో శత్రువుల కంట పడకుండా సైనికులను మరియు భారీ యుద్ధ సామాగ్రిని సురక్షితంగా తరలించేందుకు ఉపయోగపడుతుంది. నార్త్ ఈస్ట్ ఫ్రాంటియర్ రైల్వే ఆధ్వర్యంలో రూపొందుతున్న ఈ ప్రాజెక్ట్ భారత రక్షణ రంగంలో ఒక గేమ్ ఛేంజర్‌గా నిలవనుంది.

నేపాల్, భూటాన్ మరియు బంగ్లాదేశ్ సరిహద్దులకు సమీపంలో ఉన్న ఈ ప్రాంతం భద్రతా పరంగా ఎంతో సున్నితమైనది. ఈ కొత్త భూగర్భ మార్గం బాగ్డోగ్రా ఎయిర్ ఫోర్స్ స్టేషన్ మరియు బెంగ్డూబీ ఆర్మీ క్యాంటోన్మెంట్లను కలుపుతూ సాగుతుంది, దీనివల్ల వాయు మరియు రైలు మార్గాల సమన్వయం మరింత సులభతరం అవుతుంది. 25-టన్నుల యాక్సిల్ లోడ్ సామర్థ్యం కలిగిన ఈ ట్రాక్‌లు భారీ ట్యాంకులను మోసుకెళ్లేలా రూపొందించబడ్డాయి. ప్రకృతి విపత్తులు సంభవించినా లేదా సరిహద్దుల్లో ఉద్రిక్తతలు ఏర్పడినా, ఈ రహస్య మార్గం ద్వారా భారత సైన్యానికి నిరంతర సరఫరా అందుతుందని అధికారులు వెల్లడించారు.