వచ్చే ఐపీఎల్ 2026 సీజన్ ప్రారంభానికి ముందే కోల్‌కతా నైట్ రైడర్స్ జట్టుకు గట్టి ఎదురుదెబ్బ తగిలింది. ఆ జట్టు స్టార్ పేసర్ హర్షిత్ రాణా మోకాలి గాయం కారణంగా ఈ సీజన్లో మెజారిటీ మ్యాచ్‌లకు అందుబాటులో ఉండకపోవచ్చు. ఫిబ్రవరి 4న దక్షిణాఫ్రికాతో జరిగిన వార్మప్ మ్యాచ్‌లో గాయపడిన హర్షిత్‌కు, ఫిబ్రవరి 9న ముంబైలోని కోకిలాబెన్ ఆసుపత్రిలో శస్త్రచికిత్స జరిగింది. ఈ గాయం వల్ల అతను ఇప్పటికే టీ20 ప్రపంచకప్ నుండి తప్పుకోవాల్సి వచ్చింది, ఇది కేకేఆర్ శిబిరంలో ఆందోళన కలిగిస్తోంది.

వైద్యుల సమాచారం ప్రకారం, హర్షిత్ కోలుకోవడానికి కనీసం 6 నుండి 8 వారాల సమయం పడుతుంది. ఆ తర్వాత అతను బెంగళూరులోని బీసీసీఐ సెంటర్ ఆఫ్ ఎక్సలెన్స్‌లో రిహాబిలిటేషన్ పూర్తి చేయాల్సి ఉంటుంది. మార్చి 26 నుండి ఐపీఎల్ ప్రారంభం కానుండగా, హర్షిత్ ఏప్రిల్ చివరి వారం వరకు ఫిట్‌నెస్ సాధించే అవకాశం లేదు. అంటే టోర్నీలో దాదాపు సగం మ్యాచ్‌లకు అతను దూరం కానున్నాడు. కేకేఆర్ జట్టులో కీలక బౌలర్‌గా ఉన్న హర్షిత్ లేకపోవడం జట్టు బౌలింగ్ విభాగంపై తీవ్ర ప్రభావం చూపే అవకాశం ఉంది.