న్యూస్ డెస్క్ : ఆన్‌లైన్ గేమ్‌ల పిచ్చి పసిప్రాణాలను ఎలా బలి తీసుకుంటుందో చెప్పడానికి ఉత్తరప్రదేశ్ లోని ఘజియాబాద్ ఘటన ఒక నిదర్శనం. గేమ్స్ ఆడవద్దని తల్లిదండ్రులు మందలించడంతో మనస్తాపం చెందిన ముగ్గురు అక్కాచెల్లెళ్లు భవనం 10వ అంతస్తు నుండి దూకి తనువు చాలించారు. నేటి డిజిటల్ యుగంలో పిల్లలు దేనికి బానిసలవుతున్నారో గమనించడం ప్రతి తల్లిదండ్రుల బాధ్యత అని ఈ ఘటన హెచ్చరిస్తోంది. ఆన్‌లైన్ వ్యసనం కుటుంబాలను ఎంతలా చిన్నాభిన్నం చేస్తుందో ఇది స్పష్టం చేస్తోంది.

మరణించిన వారి వయసు 12 నుండి 16 ఏళ్ల మధ్య ఉంటుంది. వీరు ‘కొరియన్ లవర్’ అనే గేమ్‌కు తీవ్రంగా బానిసలైనట్లు పోలీసులు గుర్తించారు. వీరు రాసిన 8 పేజీల సూసైడ్ నోట్‌లో ఆ గేమ్ పట్ల ఉన్న పిచ్చి స్పష్టంగా కనిపిస్తోంది. గేమ్‌లోని టాస్క్‌ల కోసం పాఠశాలకు వెళ్లడం కూడా మానేసిన వీరు, చివరికి బలవన్మరణానికి పాల్పడ్డారు. ఈ విషాదకర ఘటన సమాజంలో పెరుగుతున్న డిజిటల్ వ్యసనం మరియు అది పిల్లల మానసిక స్థితిపై చూపుతున్న ప్రభావానికి అద్దం పడుతోంది.