52 ఏళ్ల తమ వైవాహిక జీవితంపై ప్రముఖ నటి జయా బచ్చన్ ఇటీవల సంచలన వ్యాఖ్యలు చేశారు. వివాహమనే భావనే ఇప్పుడు పాతబడిపోయిందని, తన మనవరాలు నవ్య నవేలిని కూడా పెళ్లి చేసుకోవద్దని తాను సూచించానని ఆమె స్పష్టంగా తెలిపారు. జీవితాన్ని ఆస్వాదించడం, ఒకరిపట్ల ఒకరు శారీరక ఆకర్షణ, సంబంధం కలిగి ఉండటం ముఖ్యమని జయా బచ్చన్ అభిప్రాయపడ్డారు. అమితాబ్ బచ్చన్ కూడా వివాహం గురించి ఇదే అభిప్రాయాన్ని కలిగి ఉన్నారా అని అడిగినప్పుడు, “ఇది నా జీవితంలో అతిపెద్ద తప్పు” అని ఆయన చెప్పవచ్చని, కానీ ఆ మాట తాను వినాలనుకోవడం లేదని జయా చమత్కరించారు.

ఐదు దశాబ్దాలకు పైగా వివాహ బంధంలో ఉన్నప్పటికీ, అమితాబ్ బచ్చన్‌ను తొలి చూపులోనే ప్రేమించినట్లు జయా బచ్చన్ అంగీకరించారు. 1973లో ‘జంజీర్’ సినిమా విజయం సాధించిన తర్వాత, లండన్ ట్రిప్‌కు వెళ్లాలనే ఒత్తిడితో ఒకే రాత్రి ఏర్పాట్లతో వారి వివాహం జరిగింది. ఈ విషయాన్ని అమితాబ్ బచ్చనే ఒక ఇంటర్వ్యూలో తెలిపారు. ఈ ప్రముఖ దంపతులకు శ్వేతా, అభిషేక్ అనే ఇద్దరు పిల్లలు ఉన్నారు.