ఛత్తీస్‌గఢ్‌లోని సూరజ్‌పూర్ జిల్లాలో రెండు రోజులుగా కనిపించకుండా పోయిన తమ కుమారుడు పురుషోత్తం చనిపోయాడని భావించి అంత్యక్రియలు నిర్వహించిన కుటుంబానికి షాకింగ్ ఘటన ఎదురైంది. అంత్యక్రియలు పూర్తయిన కొద్ది గంటల్లోనే ఆ ‘చనిపోయిన’ కుమారుడు అకస్మాత్తుగా సజీవంగా ఇంటికి తిరిగి వచ్చాడు. ఈ ఊహించని పరిణామం శోకంలో ఉన్న కుటుంబాన్ని ఏకకాలంలో సంతోషంలోకి, ఆశ్చర్యంలోకి నెట్టింది.

ఈ సంఘటన ప్రస్తుతం పోలీసులకు ఒక కొత్త సవాలుగా మారింది. మాన్‌పూర్ పోలీస్ స్టేషన్ పరిధిలో లభించిన గుర్తుతెలియని మృతదేహాన్ని బట్టలు, బూట్ల ఆధారంగా కుటుంబ సభ్యులు పొరపాటున పురుషోత్తంగా గుర్తించి అంత్యక్రియలు పూర్తిచేశారు. ఇప్పుడు పోలీసులు సేకరించిన ఆధారాలను ప్రధానంగా తీసుకుని, ఆ గుర్తుతెలియని మృతదేహం ఎవరిదో తెలుసుకోవడానికి దర్యాప్తును తిరిగి ప్రారంభించారు.