போர் எதிரொலியாக ஈரான் விளையாட்டு அமைச்சகம் அதிரடி முடிவை எடுத்துள்ளது. தங்களுக்கு விரோதமான நாடுகளுக்குத் தேசிய அல்லது கிளப் அணிகளை அனுப்ப ஈரான் தடை விதித்துள்ளது. இதன் காரணமாக சவுதி அரேபியாவில் நடைபெறவிருந்த ஆசிய சாம்பியன்ஸ் லீக் போட்டிகள் சிக்கலில் உள்ளன. மேலும், அமெரிக்காவில் நடைபெறவுள்ள உலகக்கோப்பை கால்பந்து தொடரில் ஈரான் பங்கேற்பது குறித்தும் தற்போது பெரும் கேள்விக்குறி எழுந்துள்ளது.

பாதுகாப்பு காரணங்களைக் கூறி ஈரான் இந்தத் தடையை அமல்படுத்தியுள்ளது. அமெரிக்காவில் நடைபெற வேண்டிய போட்டிகளை மெக்ஸிகோவிற்கு மாற்ற வேண்டும் என்று ஈரான் கால்பந்து கூட்டமைப்பு கோரிக்கை விடுத்துள்ளது. அண்டை நாடுகளையும் புறக்கணிக்கும் ஈரானின் இந்த அரசியல் நகர்வு, அந்த நாட்டு வீரர்களின் சர்வதேச விளையாட்டு எதிர்காலத்தைப் பாதிக்கும் என அஞ்சப்படுகிறது. இந்த விவகாரம் தற்போது சர்வதேச விளையாட்டு உலகில் பெரும் பரபரப்பை ஏற்படுத்தியுள்ளது.