செய்திப் பிரிவு : ஜிம்மிற்கு செல்பவர்கள் மற்றும் விளையாட்டு வீரர்கள் பலர் அதிக புரதம் கிடைக்கும் என நம்பி பச்சை முட்டையை அப்படியே குடிக்கிறார்கள். ஆனால், இவ்வாறு செய்வது உங்கள் ஆரோக்கியத்திற்கு நன்மையா அல்லது தீமையா? பச்சை முட்டையை விட சமைத்த முட்டையில்தான் உடலுக்குத் தேவையான சத்துக்கள் முழுமையாகக் கிடைக்கும் என்று மருத்துவர்கள் எச்சரிக்கின்றனர். சமைக்காமல் சாப்பிடும்போது ஊட்டச்சத்துக்கள் வீணாவதுடன் நோய்த்தொற்று ஏற்படும் அபாயமும் அதிகம் உள்ளது.

ஆய்வுகளின்படி, சமைத்த முட்டையிலிருந்து உடல் 90 சதவீத புரதத்தை உறிஞ்சுகிறது, ஆனால் பச்சை முட்டையிலிருந்து வெறும் 50 சதவீதத்தை மட்டுமே பெற முடிகிறது. மேலும், பச்சை முட்டையில் உள்ள பாக்டீரியாக்களால் வயிற்றுப்போக்கு, வாந்தி மற்றும் செரிமான கோளாறுகள் ஏற்பட வாய்ப்புள்ளது. இது முடியுதிர்வு மற்றும் வைட்டமின் குறைபாட்டிற்கும் வழிவகுக்கும். எனவே, உங்கள் ஆரோக்கியத்தை உறுதிப்படுத்த முட்டையை எப்போதும் வேகவைத்தோ அல்லது நன்றாகச் சமைத்தோ சாப்பிடுவதே பாதுகாப்பானது.