వుమెన్స్ ప్రీమియర్ లీగ్ (WPL) 2025లో ముంబై ఇండియన్స్ అద్భుతంగా ఫైనల్‌కి చేరుకుంది. ఎలిమినేటర్ మ్యాచ్‌లో గుజరాత్ జైయింట్స్‌ను ఓడించి హర్మన్‌ప్రీత్ కౌర్ నేతృత్వంలోని ముంబై అద్భుత విజయాన్ని సాధించింది. గత సీజన్‌లో నిరాశపరిచినప్పటికీ, ఈసారి వారు తిరిగి బలంగా మైదానంలోకి వచ్చారు. నెట్ రన్‌రేట్ ఆధారంగా ఢిల్లీ క్యాపిటల్స్ ఇప్పటికే ఫైనల్‌లోకి వెళ్లింది.

ఎలిమినేటర్‌లో ముంబై ఇండియన్స్ అద్భుత ప్రదర్శన ఇచ్చింది. 20 ఓవర్లలో 213/4 పరుగులు సాధించి, WPL ప్లే-ఆఫ్లో అత్యధిక స్కోరు నమోదు చేసింది. హేలీ మాథ్యూస్ (50 బంతుల్లో 77), నాట్ సీవర్-బ్రంట్ (41 బంతుల్లో 77), హర్మన్‌ప్రీత్ కౌర్ (12 బంతుల్లో 36) కీలక ఇన్నింగ్స్ ఆడారు. గుజరాత్ జట్టును 166 పరుగులకే ఆలౌట్ చేసింది. బౌలింగ్‌లో మాథ్యూస్ 3 వికెట్లు తీయడంతో ముంబై విజయాన్ని సులభం చేసుకుంది. ఇప్పుడు ఫైనల్లో ముంబై-ఢిల్లీ తుదిపోరు క్రికెట్ అభిమానులకు మజాను అందించనుంది.