ఆన్‌లైన్ గేమింగ్, బెట్టింగ్ వెబ్‌సైట్‌లపై కేంద్ర ఆర్థిక శాఖకు చెందిన డైరెక్టరేట్ జనరల్ ఆఫ్ గూడ్స్ అండ్ సర్వీసెస్ ఇంటెలిజెన్స్ (DGGI) పెద్దయెత్తున చర్యలు చేపట్టింది. పన్ను ఎగ్గొట్టడం, అక్రమ లావాదేవీలు నిర్వహిస్తున్న 357 వెబ్‌సైట్లను బ్లాక్ చేసింది. అంతేకాదు, ఈ సంస్థలకు చెందిన 2,400 బ్యాంక్ ఖాతాలను గుర్తించి, అందులో ఉన్న మొత్తం రూ.126 కోట్లు సీజ్ చేసినట్లు అధికారులు తెలిపారు.

ప్రస్తుతం దాదాపు 700 విదేశీ సంస్థలు భారతదేశంలో ఆన్‌లైన్ గేమింగ్, బెట్టింగ్, గ్యాంబ్లింగ్ వంటి కార్యకలాపాలను నడుపుతున్నాయని అధికారులు వెల్లడించారు. ఈ సంస్థలు భారతీయ వినియోగదారులను ఆకర్షించి, పన్నుల నుంచి తప్పించుకుంటున్నట్లు గుర్తించారు. ప్రజలు ఇలాంటి అక్రమ వెబ్‌సైట్ల పట్ల అప్రమత్తంగా ఉండాలని, తమ డబ్బును పొగొట్టుకోకుండా జాగ్రత్తలు తీసుకోవాలని అధికారులు హెచ్చరించారు. ప్రభుత్వం ఈ విధమైన బెట్టింగ్, గ్యాంబ్లింగ్ వెబ్‌సైట్లను నిరంతరం పర్యవేక్షిస్తూ, కఠిన చర్యలు తీసుకుంటుందని తెలిపారు.