ఆర్సీబీ స్టార్ ఆటగాడు విరాట్ కోహ్లీ గురించి ఆయన జట్టు సభ్యుడు ఫిల్ సాల్ట్ ఆసక్తికర వ్యాఖ్యలు చేశారు. కోహ్లీ మైదానం వెలుపల ఎంతో మంచివాడు, సరదాగా ఉండే వ్యక్తి అని ప్రశంసించారు. “విరాట్ నిజంగా మంచి వ్యక్తి. అతనితో సమయాన్ని గడపడం ఎంతో ఆనందదాయకం. ఎప్పుడూ సరదాగా ఉంటారు, అందరితో బాగా మెలుగుతారు. కానీ అది మైదానంలోకి అడుగుపెట్టిన తర్వాత పూర్తిగా మారిపోతుంది. గ్రౌండ్‌లో అతని ఆట తీరు పూర్తిగా వేరే స్థాయిలో ఉంటుంది. గెలుపే లక్ష్యంగా ఉండే విరాట్, ప్రతీ మ్యాచ్‌ను యుద్ధంలా చూస్తాడు” అని సాల్ట్ పేర్కొన్నారు.

ఈసారి ఐపీఎల్‌లో రాయల్ ఛాలెంజర్స్ బెంగళూరు తరఫున ఆడుతున్న ఫిల్ సాల్ట్, గత సీజన్‌లో కోల్‌కతా నైట్ రైడర్స్‌కు ప్రాతినిధ్యం వహించాడు. “ఈ సీజన్లో విరాట్‌తో కలిసి బ్యాటింగ్ చేయడం గొప్ప అనుభూతిని ఇస్తుంది. అతని నిబద్ధత, ఆటపై ప్రేమ చూసినప్పుడల్లా నేను కూడా ప్రభావితం అవుతున్నాను” అని సాల్ట్ తెలిపారు. కోహ్లీ మైదానంలో ఎంత తీవ్రతతో ఆడినా, బయట మాత్రం మామూలుగానే ఉంటాడని, ఇది చాలా ప్రత్యేకమైన గుణం అని సాల్ట్ అన్నారు.