పశ్చిమాసియాలో ఉద్రిక్తతల నేపథ్యంలో ఇంధన సరఫరాపై నెలకొన్న ఆందోళనలకు కేంద్ర ప్రభుత్వం తెరదించింది. దేశంలో వంట గ్యాస్ నిల్వలు నిండుగా ఉన్నాయని, గృహ వినియోగదారులకు 100 శాతం ఎల్పీజీ సరఫరాను కొనసాగిస్తామని కేంద్ర పెట్రోలియం శాఖ జాయింట్ సెక్రటరీ సుజాత శర్మ స్పష్టం చేశారు. వాణిజ్య సిలిండర్ల సరఫరాను తాత్కాలికంగా నిలిపివేసినప్పటికీ, సామాన్యులకు ఎలాంటి ఇబ్బంది కలగకుండా చర్యలు తీసుకుంటున్నట్లు తెలిపారు. హార్మూజ్ జలసంధి వద్ద భారత నౌకలు క్షేమంగానే ఉన్నాయని ఆమె పేర్కొన్నారు.

మరోవైపు, తెలంగాణ రాష్ట్ర బడ్జెట్ ముహూర్తం ఖరారైంది. 2026-27 ఆర్థిక సంవత్సరానికి సంబంధించిన వార్షిక బడ్జెట్‌ను మార్చి 20వ తేదీన ఉప ముఖ్యమంత్రి, ఆర్థిక మంత్రి మల్లు భట్టి విక్రమార్క అసెంబ్లీలో ప్రవేశపెట్టనున్నారు. గవర్నర్ శివ ప్రతాప్ శుక్లా ప్రసంగంతో ఈ బడ్జెట్ సమావేశాలు ప్రారంభమయ్యాయి. మార్చి 16 నుంచి 30 వరకు ఈ సమావేశాలు జరగనున్నాయి. మధ్యలో మార్చి 19న ఉగాది పండుగ సందర్భంగా అసెంబ్లీకి సెలవు ప్రకటించారు.

రాష్ట్రాన్ని 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడమే లక్ష్యమని గవర్నర్ తన ప్రసంగంలో వెల్లడించారు. ప్రస్తుతం రాష్ట్ర తలసరి ఆదాయం రూ. 4.18 లక్షలకు చేరిందని, ఐటీ ఎగుమతులు రూ. 3.13 లక్షల కోట్లకు పెరిగాయని తెలిపారు. రైతు భరోసా, పంట రుణమాఫీ, మహాలక్ష్మి పథకం వంటి సంక్షేమ కార్యక్రమాలతో పాటు వినూత్న ‘క్యూర్’ మోడల్ ద్వారా పట్టణ అభివృద్ధికి ప్రభుత్వం కట్టుబడి ఉందని ఆయన స్పష్టం చేశారు. మార్చి 30న బడ్జెట్ ఆమోదం పొందిన తర్వాత సభ వాయిదా పడనుంది.