లాస్ ఏంజిల్స్‌లోని డాల్బీ థియేటర్‌లో జరిగిన 98వ అకాడమీ అవార్డుల ప్రదానోత్సవం తర్వాత సెలబ్రిటీల కోసం అత్యంత విలాసవంతమైన విందును ఏర్పాటు చేశారు. ఈ వేడుకలో సుమారు 70కి పైగా రకాల ఆహార పదార్థాలను అతిథులకు వడ్డించారు. ఈ భారీ విందును సిద్ధం చేయడానికి 75 మంది ప్రధాన షెఫ్‌లు, 45 మంది పేస్ట్రీ షెఫ్‌లు మరియు 325 మంది సర్వీస్ సిబ్బంది అహోరాత్రులు శ్రమించారు.

ఈ మెనూలో జపనీస్ తరహా పబ్ ఫుడ్, తాజాగా తయారు చేసిన ఐస్‌క్రీమ్‌లు మరియు 600 హోమ్ మేడ్ పిజ్జాలు ప్రత్యేక ఆకర్షణగా నిలిచాయి. అయితే వీటన్నింటికంటే హైలైట్ ఏమిటంటే బంగారు పొడితో అలంకరించిన రెండు వేల చాక్లెట్ ఆస్కార్ విగ్రహాలు. వీటిని చూసి హాలీవుడ్ తారలు ఆశ్చర్యపోయారు. విందులో భాగంగా అతిథుల కోసం సుమారు 1,700 షాంపేన్ బాటిళ్లను కూడా అందుబాటులో ఉంచారు.

కేవలం విలాసానికే పరిమితం కాకుండా ఈ వేడుకలో మానవత్వాన్ని కూడా చాటుకున్నారు. విందు అనంతరం మిగిలిపోయిన ఆహారాన్ని వృధా చేయకుండా నిరాశ్రయులకు పంపిణీ చేయాలని నిర్వాహకులు నిర్ణయించారు. అత్యంత ఖరీదైన వంటకాలతో పాటు సామాజిక బాధ్యతను నెరవేర్చిన ఈ ఆస్కార్ డినర్ ఇప్పుడు ప్రపంచవ్యాప్తంగా హాట్ టాపిక్‌గా మారింది.