అమెరికా మరియు ఇరాన్ మధ్య అణు చర్చలు మరోసారి అసంపూర్తిగా ముగిశాయి. జెనీవా వేదికగా జరిగిన రెండో విడత చర్చల్లో కూడా ఎలాంటి పురోగతి లభించకపోవడంతో అగ్రరాజ్యం కఠిన నిర్ణయం తీసుకున్నట్లు కనిపిస్తోంది. స్విట్జర్లాండ్‌లో జరిగిన ఈ సమావేశం కేవలం మూడు గంటల్లోనే ముగియడం, ఇరు దేశాల మధ్య ఏకాభిప్రాయం కుదరకపోవడం గమనార్హం.

రంగంలోకి ఎఫ్-22 మరియు ఎఫ్-35 విమానాలు చర్చలు విఫలమైన వెంటనే అమెరికా తన సైనిక శక్తిని ప్రదర్శించడం ప్రారంభించింది. సుమారు 50 అత్యాధునిక యుద్ధ విమానాలు మధ్యప్రాచ్యం వైపు పయనిస్తున్నట్లు అంతర్జాతీయ మీడియా వెల్లడించింది. వీటిలో అత్యంత ప్రమాదకరమైన F-22, F-35 మరియు F-16 యుద్ధ విమానాలు ఉన్నాయి. వీటితో పాటు గగనతలంలోనే ఇంధనం నింపే ట్యాంకర్లు కూడా వెళ్లడం చూస్తుంటే, అమెరికా ఏదో పెద్ద సైనిక చర్యకే సిద్ధమవుతోందని స్పష్టమవుతోంది.

అరేబియా సముద్రంలో యూఎస్ఎస్ అబ్రహం లింకన్ గర్జన కేవలం ఆకాశంలోనే కాకుండా, సముద్ర మార్గంలో కూడా అమెరికా తన పట్టు బిగిస్తోంది. ఇప్పటికే అరేబియా సముద్రంలో మోహరించిన ‘యూఎస్ఎస్ అబ్రహం లింకన్’ యుద్ధనౌక శత్రువుల గుండెల్లో వణుకు పుట్టిస్తోంది. దీనితో పాటు గైడెడ్ మిస్సైల్ క్రూయిజర్లు మరియు డిస్ట్రాయర్లు యుద్ధానికి సర్వసద్ధంగా ఉన్నాయి. ఇరాన్ సైన్యాన్ని ఒక్క దెబ్బతో తుడిచిపెట్టే సామర్థ్యం ఈ స్ట్రైక్ గ్రూప్‌కు ఉందని రక్షణ రంగ నిపుణులు విశ్లేషిస్తున్నారు.

విరుద్ధమైన ప్రకటనలు ఒకవైపు అమెరికా ఉపాధ్యక్షుడు జేడీ వాన్స్ చర్చలు విఫలమయ్యాయని, ఇరాన్ తమ డిమాండ్లకు తలొగ్గడం లేదని స్పష్టం చేశారు. కానీ ఇరాన్ విదేశాంగ మంత్రి అబ్బాస్ అరఘ్చి మాత్రం చర్చలు సానుకూలంగా సాగాయని పేర్కొనడం గందరగోళానికి దారితీస్తోంది. ట్రంప్ రాయబారులు జారెడ్ కుష్నర్, స్టీవ్ విట్కాఫ్ మాట్లాడుతూ.. ఇరాన్ కొత్త ప్రతిపాదనలతో రావడానికి రెండు వారాల సమయం ఉందని తెలిపారు.

ప్రస్తుత పరిస్థితులను గమనిస్తే, చర్చల పేరుతో కాలయాపన జరుగుతుండగానే అమెరికా తన బలగాలను వ్యూహాత్మకంగా ఇరాన్ చుట్టూ మోహరిస్తోంది. హార్ముజ్ జలసంధిలో ఉద్రిక్తతలు పెరుగుతున్న నేపథ్యంలో, రానున్న కొద్ది రోజులు పశ్చిమాసియా భవితవ్యానికి అత్యంత కీలకం కానున్నాయి.