అమెజాన్ ఆఫీసులో మొదలైన పరిచయం ప్రేమగా మారి చివరికి పెళ్లి పీటల వరకు వెళ్ళింది. తమను కలిపిన సంస్థపై ఉన్న కృతజ్ఞతతో ఓ వధువు చేసిన పని ఇప్పుడు సోషల్ మీడియాలో అందరినీ ఆశ్చర్యపరుస్తోంది.

ప్రేమ చిగురించింది ఇలా

ప్రియాంషి శ్రీమల్ మరియు రజత్ వర్మ ఇద్దరూ అమెజాన్ ఇండియాలో సహోద్యోగులుగా పనిచేసేవారు. రోజువారీ ఆఫీసు పనుల మధ్య మొదలైన వీరి సంభాషణలు కాలక్రమేణా స్నేహానికి, ఆపై గాఢమైన ప్రేమకు దారితీశాయి. పెద్దల అంగీకారంతో వీరిద్దరూ వివాహం చేసుకోవాలని నిర్ణయించుకున్నారు.

వెరైటీ మెహందీ డిజైన్

సాధారణంగా పెళ్లి కూతుళ్లు తమ మెహందీలో వరుడి పేరు లేదా ఫోటోను డిజైన్ చేయించుకుంటారు. కానీ ప్రియాంషి మాత్రం ఒక అడుగు ముందుకేసి, తమ ప్రేమకు వేదికైన ‘అమెజాన్’ ఐకానిక్ స్మైల్ లోగోను తన అరచేతిపై మెహందీగా వేయించుకుంది. సాంప్రదాయ హెన్నా డిజైన్ మధ్యలో ఈ లోగో ప్రత్యేక ఆకర్షణగా నిలిచింది.

వైరల్ అవుతున్న వీడియో

అమెజాన్ అధికారిక ఇన్స్టాగ్రామ్ ఖాతా ‘ఇన్‌సైడ్ అమెజాన్’ ఈ వీడియోను షేర్ చేస్తూ “అమెజానియన్లు వివాహం చేసుకున్నప్పుడు” అనే క్యాప్షన్ ఇచ్చింది. ఈ వీడియో చూసిన నెటిజన్లు వధువు సృజనాత్మకతకు ఫిదా అవుతున్నారు. వరుడు రజత్ స్పందిస్తూ, తన జీవిత భాగస్వామిని పరిచయం చేసిన అమెజాన్ సంస్థకు ఎప్పటికీ కృతజ్ఞుడిని అని పేర్కొన్నారు. ప్రస్తుతం ఈ వెరైటీ వెడ్డింగ్ ఫోటోలు నెట్టింట తెగ హల్చల్ చేస్తున్నాయి.