తెలంగాణ రాజకీయాల్లో అత్యంత ఆసక్తి రేకెత్తిస్తున్న ఎమ్మెల్యేల పార్టీ ఫిరాయింపుల వ్యవహారం ఇప్పుడు కీలక దశకు చేరుకుంది. ఖైరతాబాద్ ఎమ్మెల్యే దానం నాగేందర్‌పై దాఖలైన అనర్హత పిటిషన్లపై శాసనసభ స్పీకర్ గడ్డం ప్రసాద్ కుమార్ బుధవారం తన ఛాంబర్‌లో విచారణ చేపట్టనున్నారు.

బీఆర్ఎస్ నుంచి కాంగ్రెస్‌లోకి మారిన దానం నాగేందర్‌పై ఇప్పటికే ప్రతిపక్షాలు పాడి కౌశిక్ రెడ్డి (బీఆర్ఎస్), ఏలేటి మహేశ్వర్ రెడ్డి (బీజేపీ) వేర్వేరుగా ఫిర్యాదులు చేసిన సంగతి తెలిసిందే. ఈ రెండు పిటిషన్లను స్పీకర్ క్షుణ్ణంగా పరిశీలించి, ఇరు పక్షాల వాదనలను విననున్నారు.

ఇప్పటికే ఫిరాయింపుల ఆరోపణలు ఎదుర్కొన్న ఎనిమిది మంది ఎమ్మెల్యేలకు స్పీకర్ ‘క్లీన్ చిట్’ ఇవ్వడంతో, ఇప్పుడు దానం నాగేందర్ విషయంలో ఎలాంటి నిర్ణయం వస్తుందనేది ఉత్కంఠగా మారింది. మరోవైపు, స్టేషన్ ఘన్‌పూర్ ఎమ్మెల్యే కడియం శ్రీహరిపై దాఖలైన పిటిషన్‌ను స్పీకర్ రేపు (గురువారం) విచారించనున్నారు. వరుసగా జరుగుతున్న ఈ విచారణలతో తెలంగాణ అసెంబ్లీ వర్గాల్లో ఒక్కసారిగా రాజకీయ వేడి పెరిగింది. స్పీకర్ తీసుకోబోయే తుది నిర్ణయం రాష్ట్ర రాజకీయ ముఖచిత్రాన్ని ఎలా మారుస్తుందో వేచి చూడాలి.