ఆంధ్రప్రదేశ్‌లోని సంక్షేమ హాస్టళ్లలో ఖాళీగా ఉన్న పోస్టుల భర్తీకి కూటమి ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా ఉన్న బీసీ, ఎస్సీ, ఎస్టీ హాస్టళ్లలో సిబ్బంది కొరతను తీర్చి, విద్యార్థులకు మెరుగైన సౌకర్యాలు కల్పించడమే లక్ష్యంగా భారీ రిక్రూట్‌మెంట్‌కు శ్రీకారం చుట్టింది. అసెంబ్లీ వేదికగా మంత్రి సవిత ఈ కీలక ప్రకటన చేస్తూ, త్వరలోనే నోటిఫికేషన్ విడుదల చేయనున్నట్లు స్పష్టం చేశారు.

మొత్తం 1,433 ఖాళీలను భర్తీ చేయాలని ప్రభుత్వం నిర్ణయించింది. ఇందులో ప్రధానంగా మూడు విభాగాల్లో నియామకాలు జరగనున్నాయి. విద్యార్థులకు నాణ్యమైన భోజనం అందించేందుకు కుక్‌లు, హాస్టల్ నిర్వహణలో తోడ్పడే హెల్పర్లు, ఆవరణలను పరిశుభ్రంగా ఉంచే పారిశుద్ధ్య సిబ్బందిని నియమించనున్నారు. మంత్రి వెల్లడించిన వివరాల ప్రకారం 142 కుక్ మరియు హెల్పర్ పోస్టులు, 1291 పారిశుద్ధ్య సిబ్బంది పోస్టులను భర్తీ చేయనున్నారు. ఈ పోస్టులను అవుట్‌సోర్సింగ్ లేదా కాంట్రాక్ట్ ప్రాతిపదికన భర్తీ చేసే అవకాశం ఉంది.

కేవలం సిబ్బంది నియామకం మాత్రమే కాకుండా, హాస్టళ్లలో మౌలిక సదుపాయాల మెరుగుదలపై కూడా ప్రభుత్వం ప్రత్యేక దృష్టి సారించింది. నాణ్యమైన ఆహారం, శుభ్రమైన తాగునీరు, మరుగుదొడ్ల సౌకర్యం కల్పించేందుకు ప్రాధాన్యత ఇస్తున్నట్లు మంత్రి తెలిపారు. గత కొంతకాలంగా సిబ్బంది లేక విద్యార్థులు పడుతున్న ఇబ్బందులకు ఈ నిర్ణయంతో చెక్ పడనుంది.

వీటితో పాటు విద్యారంగంలో మరిన్ని కీలక మార్పులను మంత్రి ప్రకటించారు. రాష్ట్రంలో కొత్తగా 10 ఎంజేపీ బీసీ గురుకులాలను ఏర్పాటు చేయడంతో పాటు, మరో 6 గురుకుల పాఠశాలలను కళాశాలలుగా అప్‌గ్రేడ్ చేయనున్నట్లు వెల్లడించారు. విద్యార్థుల సంక్షేమం కోసం పోస్ట్ మెట్రిక్ స్కాలర్‌షిప్‌ల కింద రూ.420 కోట్లు, ఫీజు రీయింబర్స్‌మెంట్ కోసం రూ.933 కోట్లు కేటాయించినట్లు ప్రభుత్వం వివరించింది. నిరుద్యోగులకు ఇది మంచి అవకాశంగా మారనుంది.