ప్రధాని నరేంద్ర మోదీ నేడు శుక్రవారం సాయంత్రం ప్రధానమంత్రి కార్యాలయం కొత్త భవనం ‘సేవా తీర్థ్’ తో పాటు ‘కర్తవ్య భవన్ 1 మరియు 2’లను ప్రారంభించనున్నారు. దీనికి ముందు ఆయన సౌత్ బ్లాక్‌లోని పాత సెక్రటేరియట్ భవనంలో చివరి కేంద్ర క్యాబినెట్ సమావేశానికి అధ్యక్షత వహిస్తారు. సుమారు 125 ఏళ్ల బ్రిటిష్ నిర్మాణ శైలి ముద్రను చెరిపివేస్తూ, స్వతంత్ర భారత ఆధునిక పాలనా వ్యవస్థలో ఈ నూతన భవనాలు సరికొత్త చరిత్రను సృష్టించబోతున్నాయి.

ఈ సేవా తీర్థ్ భవనంలో PMOతో పాటు జాతీయ భద్రతా మండలి మరియు క్యాబినెట్ సెక్రటేరియట్ కూడా కొలువుదీరనున్నాయి. పాత భవనాలను ‘యుగే యుగేన్ భారత్ జాతీయ మ్యూజియం’గా ప్రభుత్వం తీర్చిదిద్దనుంది. పర్యావరణ హితంగా, 4-స్టార్ GRIHA ప్రమాణాలతో నిర్మించిన ఈ అత్యాధునిక భవనాల్లో రక్షణ, ఆర్థిక వంటి కీలక మంత్రిత్వ శాఖల కార్యాలయాలు పనిచేస్తాయి. ఇది భారత పరిపాలనలో ఒక కీలక మైలురాయిగా నిలవనుంది.