ఒక మహిళకు శస్త్రచికిత్స చేసే సమయంలో డాక్టర్ ప్రియా పాటిల్ ఎక్స్రే తీయగా, ఆమె ఊపిరితిత్తుల్లో ముక్కు పుడకకు సంబంధించిన ఒక చిన్న స్క్రూ చిక్కుకున్నట్లు గుర్తించి దిగ్భ్రాంతి చెందారు. ముక్కు పుడకలు లేదా ఇతర చిన్న ఆభరణాలు వదులుగా ఉన్నప్పుడు, మనం మాట్లాడినా, నవ్వినా లేదా నిద్రపోతున్నప్పుడు అవి తెలియకుండానే శ్వాసనాళం ద్వారా ఊపిరితిత్తుల్లోకి వెళ్లే ప్రమాదం ఉందని వైద్యులు హెచ్చరిస్తున్నారు. ఇవి పరిమాణంలో చాలా చిన్నవిగా ఉండటం వల్ల వెంటనే శ్వాస ఇబ్బందులు కలగవు, దీనివల్ల బాధితులు తమ ప్రాణాపాయాన్ని గుర్తించలేకపోతున్నారని సోషల్ మీడియాలో షేర్ చేసిన ఒక అవగాహన వీడియోలో ఆమె పేర్కొన్నారు.

ఇలాంటి వస్తువులు ఊపిరితిత్తుల్లో ఎక్కువ కాలం ఉండిపోతే అది ప్రాణాలకే ముప్పు తెస్తుందని వైద్య నిపుణులు హెచ్చరిస్తున్నారు. ఇవి ఊపిరితిత్తుల పొరలను దెబ్బతీసి వాపు, రక్తస్రావం లేదా తీవ్రమైన ఇన్ఫెక్షన్లకు దారితీసే అవకాశం ఉంది. నిరంతర దగ్గు, శ్వాస తీసుకోవడంలో ఇబ్బంది వంటి లక్షణాలు కనిపిస్తే వెంటనే అప్రమత్తం కావాలని వారు సూచిస్తున్నారు. ప్రస్తుతం ‘బ్రోంకోస్కోపీ’ అనే ఆధునిక చికిత్స విధానం ద్వారా ఎటువంటి కోత లేకుండానే ఊపిరితిత్తుల్లో చిక్కుకున్న ఇలాంటి వస్తువులను సులభంగా బయటకు తీయవచ్చు. మహిళలు, చిన్న పిల్లలు ఆభరణాలు ధరించేటప్పుడు అత్యంత జాగ్రత్తగా ఉండాలని ఈ ఘటన మరోసారి గుర్తు చేస్తోంది.