బంగ్లాదేశ్‌లో నెలకొన్న రాజకీయ అస్థిరత కారణంగా టీ20 వరల్డ్ కప్ ఆడలేకపోయిన ఆ దేశ క్రికెట్ బోర్డుకు ఐసీసీ అనూహ్య మద్దతు ప్రకటించింది. సాధారణంగా ఇలాంటి పరిస్థితుల్లో భారీ జరిమానాలు లేదా నిషేధం విధించే అవకాశం ఉన్నప్పటికీ, జై షా నేతృత్వంలోని ఐసీసీ బోర్డు బంగ్లాదేశ్‌పై ఎలాంటి క్రమశిక్షణా చర్యలు తీసుకోకూడదని నిర్ణయించింది. ఈ టోర్నీకి దూరం కావడం వల్ల ఇప్పటికే బంగ్లాదేశ్ క్రికెట్ ఆర్థికంగా దెబ్బతిన్నదని, ఇప్పుడు మళ్లీ శిక్షలు విధిస్తే ఆ దేశ క్రికెట్ మనుగడ కష్టమవుతుందని ఐసీసీ ఉన్నతాధికారి సంయోగ గుప్త పేర్కొన్నారు. రాజకీయాలకు అతీతంగా క్రికెట్ అభివృద్ధిని కాపాడటమే తమ ప్రాధాన్యతని ఆయన స్పష్టం చేశారు.

మరోవైపు బిసిబి చీఫ్ అమినుల్ ఇస్లాం బుల్బుల్ ఒక ఇంటర్వ్యూలో ఆసక్తికర విషయాలను వెల్లడించారు. బంగ్లాదేశ్ స్థానంలో స్కాట్లాండ్‌ను చేర్చుకోవాలని ఐసీసీ భావించినప్పుడు, భారత్ మరియు పాకిస్థాన్ బోర్డులు బంగ్లాదేశ్ కోసం చివరి నిమిషం వరకు వేచి చూడాలని కోరాయని ఆయన తెలిపారు. ముఖ్యంగా పాకిస్థాన్ ఈ విషయంలో బంగ్లాదేశ్‌కు గట్టి మద్దతు ఇచ్చిందని, అవసరమైతే తాము కూడా తప్పుకుంటామని హెచ్చరించిందని ఆయన పేర్కొన్నారు. అయితే క్రికెట్ నష్టపోకూడదనే ఉద్దేశంతో తానే వారిని వారించినట్లు బుల్బుల్ వెల్లడించారు. ప్రస్తుతం బంగ్లాదేశ్ స్థానంలో స్కాట్లాండ్ ఈ ప్రపంచకప్‌లో బరిలోకి దిగుతోంది.