అమెరికాలోని అయోవాలో ఒక ఆశ్చర్యకరమైన సంఘటన వెలుగులోకి వచ్చింది. ఫెడెక్స్ కంపెనీలో పనిచేసే అమేథిస్ట్ బ్లూమ్‌బెర్గ్ అనే మహిళ తన షిఫ్ట్ ముగించే సమయంలో అకస్మాత్తుగా ప్రసవ వేదనకు గురై ఆఫీసు బాత్‌రూమ్‌లోనే ఒక మగబిడ్డకు జన్మనిచ్చింది. విశేషమేమిటంటే, ఆమె తొమ్మిది నెలల గర్భవతి అనే విషయం ప్రసవ సమయం వరకు ఆమెకు గానీ, ఆమె చుట్టుపక్కల వారికి గానీ తెలియదు. సాధారణంగా గర్భధారణ సమయంలో బరువు పెరుగుతారు, కానీ అమేథిస్ట్ విషయంలో బరువు తగ్గడంతో ఆమె ఈ విషయాన్ని అస్సలు పసిగట్టలేకపోయింది. బాత్‌రూమ్‌లో బిడ్డ తల బయటకు రావడాన్ని గమనించిన ఆమె వెంటనే సహాయం కోసం కేకలు వేయగా, రెస్క్యూ టీం వచ్చి సురక్షితంగా డెలివరీ చేశారు.

మూడు కిలోల బరువుతో జన్మించిన ఈ బిడ్డకు ‘ఓనిక్స్ కింగ్’ అని పేరు పెట్టారు. తల్లి, బిడ్డ ఇద్దరూ ప్రస్తుతం ఆరోగ్యంగా ఉన్నారు. తనకు ఇదివరకే ఒక సంతానం ఉన్నందున గర్భధారణ లక్షణాలు తెలుసని, కానీ ఈసారి ఎలాంటి కదలికలు లేదా మార్పులు కనిపించలేదని అమేథిస్ట్ మీడియాకు తెలిపారు. ప్రసవ సమయంలో వెన్నునొప్పి రావడంతోనే తాను గర్భవతినని అర్థమైందని ఆమె పేర్కొన్నారు. ఈ అరుదైన మరియు అద్భుతమైన ఘటన ఇప్పుడు సోషల్ మీడియాలో వైరల్‌గా మారింది, తన బిడ్డను ఆమె సరదాగా ‘ఫెడెక్స్ బేబీ’ అని పిలుచుకుంటున్నారు.