మాజీ సైన్యాధిపతి జనరల్ మనోజ్ ముకుంద్ నరవాణే రచించిన ‘ఫోర్ స్టార్స్ ఆఫ్ డెస్టినీ’ పుస్తకం చుట్టూ సాగుతున్న రాజకీయ వివాదం వల్ల పెంగ్విన్ రాండమ్ హౌస్ ఇండియా పేరు ఇప్పుడు దేశవ్యాప్తంగా మారుమోగుతోంది. పార్లమెంటులో రాహుల్ గాంధీ ఈ పుస్తకానికి సంబంధించిన అంశాలను ప్రస్తావించిన నేపథ్యంలో, ఆ పుస్తకం ఇంకా అధికారికంగా విడుదల కాలేదని సంస్థ స్పష్టం చేసింది. ఈ పరిణామాలతో అసలు ఈ పబ్లిషింగ్ సంస్థ ఆదాయం ఎంత, ఇది ఏ దేశానికి చెందినది అనే ఆసక్తి పాఠకులలో పెరిగింది.

న్యూయార్క్ ప్రధాన కేంద్రంగా పనిచేసే ఈ అంతర్జాతీయ సంస్థ, గత 40 ఏళ్లుగా భారతీయ మార్కెట్‌లో కీలక పాత్ర పోషిస్తోంది. 2024 ఆర్థిక సంవత్సరంలో ప్రపంచవ్యాప్తంగా ఈ సంస్థ సుమారు రూ. 52,000 కోట్ల ఆదాయాన్ని ఆర్జించగా, భారత్‌లో దీని ఆదాయం రూ. 405 కోట్లకు చేరుకుంది. ప్రతి సంవత్సరం సగటున 300కు పైగా కొత్త పుస్తకాలను ముద్రించే ఈ సంస్థ, కేవలం ఇంగ్లీష్‌లోనే కాకుండా తెలుగు, హిందీ వంటి ప్రాంతీయ భాషల్లో కూడా తన కార్యకలాపాలను విస్తరిస్తోంది. ప్రస్తుతం 3,000కు పైగా పుస్తకాలతో బలమైన మార్కెట్ వాటాను కలిగి ఉంది.