రాజస్థాన్‌లోని బార్మర్ జిల్లా ఆటి గ్రామంలో గత 350 ఏళ్లుగా ఒక్క ఇంట్లో కూడా వివాహ వేడుకలు జరగలేదు. మేఘవాల్ వర్గానికి చెందిన ఇక్కడి ప్రజలు తమ ఇంటి ఆవరణలో పెళ్లి చేసుకుంటే సంతాన సమస్యలు వస్తాయని బలంగా నమ్ముతారు. అందుకే ఈ గ్రామంలో ఏ శుభకార్యమైనా స్థానిక చాముండా మాత ఆలయంలోనే నిర్వహిస్తారు. పెళ్లి వేడుకలు, విందు, వినోదాలే కాకుండా, కొత్తగా పెళ్లైన వధువు కూడా మొదటి రాత్రి ఇంట్లో కాకుండా ఆలయంలోనే గడపాల్సి ఉంటుంది. మరుసటి రోజు ఉదయం ప్రత్యేక పూజల తర్వాతే ఆమె అత్తగారింట్లో అడుగుపెడుతుంది.

సుమారు మూడున్నర శతాబ్దాల క్రితం జైసల్మేర్ నుండి వలస వచ్చిన జైపాల్ గోత్రం వారు ఈ సంప్రదాయాన్ని మొదలుపెట్టారు. తమ కులదైవమైన చాముండా మాత ఆలయాన్ని సర్వస్వంగా భావించే వీరు, అప్పటి నుండి నేటి వరకు పెళ్లిళ్లను అక్కడే జరుపుతున్నారు. అందుకే ఈ గ్రామంలోని ప్రతి ఇంటి ముంగిట ఇప్పటికీ ‘కుమారి’గానే మిగిలిపోయింది. ఆటి గ్రామంలో ఏటా జరిగే చాముండా మాత మేళాలో కొత్త జంటలు తమ మొక్కులు చెల్లించుకోవడం ఇక్కడి ప్రత్యేకత. ఈ వింత ఆచారం నేటి ఆధునిక కాలంలోనూ చెక్కుచెదరకుండా కొనసాగుతోంది.