ప్రముఖ చిత్రం ‘జననాయగన్’ సెన్సార్‌ సర్టిఫికేషన్ విషయంలో సెంట్రల్ బోర్డ్ ఆఫ్ ఫిలిం సర్టిఫికేషన్ (సీబీఎఫ్‌సీ) పై గతంలో దాఖలు చేసిన కేసును వెనక్కి తీసుకోవాలని చిత్ర నిర్మాతలు నిర్ణయించుకున్నారు. ఈ మేరకు వారు మద్రాస్ హైకోర్టు రిజిస్ట్రీకి అధికారిక లేఖను సమర్పించారు. చట్టపరమైన పోరాటం కంటే సెన్సార్ బోర్డు సూచించిన మార్పులు చేయడం ద్వారా సినిమాను త్వరగా ప్రేక్షకుల ముందుకు తీసుకురావచ్చని వారు భావిస్తున్నారు. వాస్తవానికి ఈ సినిమా జనవరి 9న విడుదల కావాల్సి ఉండగా, సెన్సార్ ఇబ్బందుల కారణంగా వాయిదా పడింది.

న్యాయపరమైన వివాదాలకు స్వస్తి పలికి, సినిమాలో అవసరమైన మార్పులు చేసి మరోసారి రివైజింగ్ కమిటీని సంప్రదించనున్నట్లు నిర్మాతలు ఆ లేఖలో స్పష్టం చేశారు. ఐదుగురు సభ్యులతో కూడిన కమిటీ సూచనల మేరకు సినిమాలోని అభ్యంతరకర సన్నివేశాలను సరిచేసి, క్లీన్ సర్టిఫికేట్ పొందడమే లక్ష్యంగా అడుగులు వేస్తున్నారు. ఈ సానుకూల నిర్ణయంతో జననాయగన్ చిత్రం త్వరలోనే థియేటర్లలో సందడి చేసే అవకాశం కనిపిస్తోంది.