మహారాష్ట్రలోని సోలాపూర్‌లో గల ఓ అపార్ట్‌మెంట్ 17వ అంతస్తు నుండి దూకి పుణెకు చెందిన ప్రముఖ వ్యాపారవేత్త సునీల్ మోతీలాల్ సద్రాంగని బలవన్మరణానికి పాల్పడ్డారు. సోలాపూర్‌లోని సుప్రసిద్ధ ‘ముల్తానీ బేకరీ’ యజమాని అయిన ఆయన, విజయపూర్ రోడ్డులోని పానాష్ అపార్ట్‌మెంట్ కాంప్లెక్స్‌లో ఈ ఘాతుకానికి ఒడిగట్టారు. భవనంపై ఆయన అనుమానాస్పదంగా తిరుగుతుండటం గమనించిన సెక్యూరిటీ సిబ్బంది మొదట ఆయనను అడ్డుకుని పదో అంతస్తుకు తీసుకువచ్చారు. అయితే తన కారు తాళాలు పైన మర్చిపోయానని అబద్ధం చెప్పి తప్పించుకున్న సునీల్, వెంటనే మళ్ళీ 17వ అంతస్తుకు చేరుకుని కాసేపు ప్రార్థన చేసిన అనంతరం కిందకు దూకేశారు.

సమాచారం అందుకున్న పోలీసులు ఘటనాస్థలికి చేరుకుని ఆయనను ఆసుపత్రికి తరలించగా అప్పటికే మరణించినట్లు వైద్యులు ధృవీకరించారు. అపార్ట్‌మెంట్ బయట ఉన్న కారు నంబర్ ఆధారంగా బాధితుడి గుర్తింపును పోలీసులు నిర్ధారించారు. 59 ఏళ్ల సునీల్ గత కొంతకాలంగా తీవ్ర మానసిక ఒత్తిడిలో ఉన్నారని, వ్యాపార నష్టాలు లేదా వ్యక్తిగత కారణాల వల్ల ఈ నిర్ణయం తీసుకుని ఉండవచ్చని పోలీసులు అనుమానిస్తున్నారు. ఆయన ఆ భవనానికి ఎందుకు వచ్చారు మరియు అక్కడ ఆయనకు ఎవరైనా బంధువులు ఉన్నారా అనే కోణంలో పోలీసులు ప్రస్తుతం సీసీటీవీ దృశ్యాలను విశ్లేషిస్తూ విచారణ జరుపుతున్నారు.