న్యూస్ డెస్క్ : ఆన్‌లైన్ గేమింగ్ వ్యసనం మరోసారి ఊహించని విషాదాన్ని మిగిల్చింది. ఘజియాబాద్‌కు చెందిన ముగ్గురు సోదరీమణులు ‘కొరియన్ లవర్ గేమ్’ మాయలో పడి 9వ అంతస్తు నుండి దూకి ఆత్మహత్య చేసుకున్నారు. డిజిటల్ ప్రపంచంలో దాగున్న ఈ మరణపు ఉచ్చులు మన పిల్లల ప్రాణాలను ఎలా బలి తీసుకుంటున్నాయో అనడానికి ఈ ఘటనే నిదర్శనం. సోషల్ మీడియా పిచ్చి సామాన్య ప్రజల జీవితాలను ఎంతగా చిన్నాభిన్నం చేస్తుందో అని సమాజం ఇప్పుడు ఆందోళన చెందుతోంది.

కొరియన్ పాప్ సంస్కృతి ఆధారంగా రూపొందిన ఈ గేమ్, 50 టాస్క్‌లతో ప్లేయర్లను తన నియంత్రణలోకి తీసుకుంటుంది. మొదట్లో సరదాగా అనిపించే ఈ పనులు క్రమంగా ప్రాణాపాయ స్థితికి చేరుకుంటాయి. బ్లూ వేల్ ఛాలెంజ్ తరహాలోనే, ఇది కూడా యూజర్లను మానసికంగా బలహీనపరిచి చివరకు ఆత్మహత్యకు ప్రేరేపిస్తుంది. ఇంటర్నెట్ యుగంలో మన పిల్లల యాక్టివిటీస్‌పై ఓ కన్నేసి ఉంచడం ఇప్పుడు అత్యవసరంగా మారింది.