ఛత్తీస్‌గఢ్‌లోని బిలాస్‌పూర్‌లో బోరింగ్ తవ్వుతుండగా ఒక ఊహించని ప్రమాదం చోటుచేసుకుంది. ఒక ఖాళీ ప్లాట్‌లో భారీ యంత్రాలతో బోరింగ్ పనులు నిర్వహిస్తుండగా, భూగర్భంలో విపరీతమైన ఒత్తిడి ఏర్పడింది. దీనివల్ల పక్కనే ఉన్న ఇంటి పాత బోరింగ్ పైపు ఒక్కసారిగా పేలిపోయింది. జనవరి 29 రాత్రి జరిగిన ఈ భయంకర దృశ్యం అక్కడి సిసిటివి కెమెరాలో రికార్డవ్వగా, ప్రస్తుతం ఈ వీడియో సోషల్ మీడియాలో వైరల్ అవుతోంది.

వైరల్ అవుతున్న వీడియోలో భూమి ఒక్కసారిగా బీటలు వారి, నీరు అత్యంత వేగంతో సునామీలా పైకి చిమ్మడం కనిపిస్తుంది. నీటి ఉధృతికి భయపడి అక్కడ ఉన్న జనం పరుగులు తీశారు. ఇలాంటి పనులు చేసేటప్పుడు చుట్టుపక్కల ప్రాంతాల్లో ఉన్న పైపులైన్ల గురించి ముందస్తు జాగ్రత్తలు తీసుకోకపోవడం వల్ల ఇలాంటి ప్రమాదాలు జరుగుతాయని నిపుణులు హెచ్చరిస్తున్నారు. ఈ ఘటన నిర్మాణ రంగంలో భద్రతా ప్రమాణాల అవసరాన్ని మరోసారి గుర్తుచేసింది.