జపాన్ పార్లమెంటు భవనంలో మహిళా ప్రతినిధులకు కనీస సౌకర్యాలు లేకపోవడం ఇప్పుడు చర్చనీయాంశంగా మారింది. దేశ తొలి మహిళా ప్రధాని సనే తకైచి ఈ సమస్యపై గళం విప్పడంతో ఈ విషయం వెలుగులోకి వచ్చింది. ప్రస్తుతం 73 మంది మహిళా ఎంపీలు ఉన్నప్పటికీ, ప్రధాన సభ వద్ద కేవలం రెండు టాయిలెట్ క్యూబికల్స్ మాత్రమే అందుబాటులో ఉండటంతో వారు తీవ్ర ఇబ్బందులు పడుతున్నారు.

దాదాపు 90 ఏళ్ల క్రితం అంటే 1936లో ఈ భవనాన్ని నిర్మించినప్పుడు మహిళలకు ఓటు హక్కు లేకపోవడంతో సరైన వసతులు కల్పించలేదు. 2024 ఎన్నికల్లో రికార్డు స్థాయిలో మహిళా ఎంపీలు ఎన్నికవడంతో ఈ సమస్య జటిలమైంది. ఇది కేవలం ఎంపీలకే కాకుండా అక్కడ పనిచేసే మహిళా జర్నలిస్టులు మరియు సిబ్బందికి కూడా పెద్ద సమస్యగా మారిందని ఎంపీ యాసుకో కోమియామా ఆవేదన వ్యక్తం చేశారు.