హైదరాబాద్‌ జగద్గిరిగుట్టలో కొత్త ఏడాది వేడుకలు తీవ్ర విషాదాన్ని నింపాయి. కమ్యూనిటీ హాల్‌లో జరిగిన విందులో చికెన్ బిర్యానీ తిని మద్యం సేవించిన వారిలో 53 ఏళ్ల రామన్ పాండు మృతి చెందగా, మరో 11 మంది తీవ్ర అస్వస్థతకు గురయ్యారు. గురువారం మధ్యాహ్నం నుంచి బాధితులకు వాంతులు, కడుపునొప్పి రావడంతో వారిని హుటాహుటిన ఆసుపత్రికి తరలించారు. ప్రస్తుతం తొమ్మిది మంది మల్లా రెడ్డి ఆసుపత్రిలో, ఇద్దరు రామ్ దేవ్ ఆసుపత్రిలో చికిత్స పొందుతున్నారు.

ఈ ఘటనపై కేసు నమోదు చేసిన పోలీసులు ఆహారం మరియు మద్యం నమూనాలను ఫోరెన్సిక్ ల్యాబ్‌కు పంపారు. వంట మధ్యలో స్థానిక దుకాణం నుండి తెచ్చిన మసాలా పొడుల వల్ల ఆహారం విషపూరితమైందా లేక కల్తీ మద్యం కారణమా అనే కోణంలో దర్యాప్తు చేస్తున్నారు. పోస్టుమార్టం నివేదిక వచ్చిన తర్వాతే మరణానికి గల అసలు కారణాలు తెలుస్తాయని అసిస్టెంట్ పోలీస్ కమిషనర్ నరేష్ రెడ్డి వెల్లడించారు.