శివ పురాణం ప్రకారం పార్వతీ దేవి పరమశివుడిని భర్తగా పొందడానికి సముద్ర తీరంలో ఘోర తపస్సు చేశారు. ఆమె తేజస్సును చూసి మోహించిన సముద్ర దేవుడు తనను వివాహం చేసుకోవాలని కోరాడు. పార్వతీ దేవి ఆ ప్రతిపాదనను సున్నితంగా తిరస్కరించగా, అహంకారంతో సముద్ర దేవుడు శివుడిని భస్మధారి అని అవమానించాడు. తన తీపి నీరు లోకానికి ప్రాణాధారమని గర్వంగా చెప్పుకున్నాడు.

మహదేవుని పట్ల సముద్ర దేవుడు చేసిన అనుచిత వ్యాఖ్యలకు పార్వతీ దేవి తీవ్ర ఆగ్రహం వ్యక్తం చేసింది. ఏ తీపి నీటిని చూసి నువ్వు ఇంతలా గర్విస్తున్నావో, అది ఈ రోజు నుండి తాగడానికి వీలు లేకుండా పోతుందని ఆమె శపించింది. తల్లి ఇచ్చిన ఆ శాపం వల్లే సముద్రపు నీరు శాశ్వతంగా ఉప్పగా మారిపోయింది. ఇలా పార్వతీ దేవి సముద్రుని అహంకారాన్ని అణచివేసింది.